قبل ما ابدء استثمار في البورصة من سنة وشوية تقريبا ... مكنتش عارف امشي منيين ولا اروح فيين ... وفضلت بين ناريين .. بين التحليل الفني والمالي ... واكتشفت في الآخر ان كل أداة من دول ليها وقتها وطريقتها .... علشان كده لما بدءت ادرس سوق المال بشكل اكاديمي .. ورغم حبي للتحليل الفني الا اني فضلت ابدء بشيء اكاديمي الاول اعرف فيه توجهات الاقتصاد وعلاقة ده بسوق المال .. وبعترف ان الدراسة غيرت كتير من فكري .. واسمحولي ابين شوية نقاط قد تخطيء وقد تصيب ...
المرحلة اللي احنا فيها دلوقتي التحليل الفني فيها فاشل بنسبة كبيرة .... ممكن تتعدى الـ 75% ... والادلة والبراهين كتيرة بس هشرح الاول شوية نقاط ...
اولا ... قمة الغلط انك قبل ما تحضر الجلسة بتاعتك تبص تشوف اسواق العالم الغربي ماشية ازاي ... شتان بين بورصة مصر وبورصة امريكا ... وسيبونا نوضح شوية اسباب في الموضوع ده ...
- سوق المال هوة مرآة للاقتصاد في دولة ما ... يعني تقدر تعرف اقتصاد دولة ما ماشي ازاي من خلال مؤشر سوق المال بتاعها ... لان مش كل الناس بتفكر بطريقة المضارب ... وفيه فلوس استثمارية زي ما شرحها استاذنا الفاضل وليد من شوية بتدخل على حس النمو الاقتصادي المتوقع في الدولة دي ... يعني اعرفو ان الاجانب لما بيشترو في اسهمنا مش حب فينا ... ده لمصلحة شخصية 100% ...
- لو سألنا نفسنا .. هل فعلا اقتصادنا مرتبط بدولة زي امريكا مهيمنة على اقتصاد 25% من العالم ... الاجابة دلوقتي لا طبعا ... لاسباب كتيرة ... الاقتصاد المصري لم يدخل موضوع عولمة الاقتصاد مع العالم الا من فترة بسيطة في قطاعات معينة جدا ... يعني الارتباط لسة نسبته صغيرة ... كمان اقتصادنا والنمو الاقتصادي اللي انتم شايفينه ماشي بنظام النمو الارادي بتخطيط من الحكومة اللي بتدخل في كل كبيرة وصغيرة .. انما اقتصاد امريكا اقتصاد حر ونموه لا ارادي ماشي على حسب الحالة السائدة من المستثمريين والاوضاع المستجدة على الاوضاع والساحة الاقتصادية والسياسية العالمية ...
- نسبة التبادل التجاري بينا وبين امريكا ضعيفة ... وارتباطنا المصرفي والائتماني بيهم تقريبا مفيش ... واغلب الشركات المقيدة بالبورصة المصرية بتاعتنا شغلها محلي ولو توسعت بتكون في منطقة الشرق الاوسط اللي عندها فوائض نقدية كبيرة جدا بسبب مبيعات الذهب الاسود .. يعني شركاتنا شغالة 100% ... وبتكسب وعال العال .. ومتوقع ليها معدل نمو مرتفع كل سنة .. على الاقل لحد 2015 ...
- اغلب قطاعاتنا في بداية مرحلة نمو ... زي ما بتكون فاتح شركة جديد في مجال جديد وبتبدء من الاول .. يعني مثلا .. قطاع البنوك وبعد القرار الناجح جدا في فرض ضرائب على اذون الخزانة وزيادة الفائدة على الودائع لتقليص ارباح البنوك كهدف اساسي .. شوف البنوك دي هتبدء استثمار في حاجات بدءت في امريكا من عقود واحنا لسة يادوبك هنبدء .. زي مثلا نظام التمويل العقاري اللي السنة الجاية متوقعله رواج واللي انهار في امريكا ... بداية انشاء محافظ استثمارية جديدة هتدخل سيولة منها كبيرة في السوق .. والامثلة كتيرة .. وتوقعو من البنك المركزي قرارات جديدة لاجبار البنوك على الاستثمار والتفاعل مع الاقتصاد ... وانا متوقع ده قريبا ...
طيب ايه المتوقع ... منطقة شرق اوسط كانت معزولة عن العالم اقتصاديا وتجاريا .. بنستورد وبس ... وآخرنا استيراد ... ودلوقتي فوائض نقدية من الذهب الاسود خصوصا الخليج بالمليارات مش عارفة تروح فين .. واقتصاد متهاوي لامريكا .. ومحاولة من دول اوروبا لكسب ود دول الشرق الاوسط سواء لاجتذاب بعض الفوائض النقدية للاستثمار في بلدها .. او عمل مصانع كثيفة الاستهلاك للطاقة في دول الشرق اوسطية بعد الارتفاع الجنوني في اسعار البترول واللي مأثر بشكل كبير على صناعات دول اوروبا ودول شرق آسيا ...
بدءنا نتحكم في صناعات مهمة جدا في العالم مثل صناعة الاسمنت والاسمدة .... عندنا غاز طبيعي يكفي الى حد كبير الصناعات دي كلها ... ادينا العالم بعض الاطمئنان بتصدير الغاز لاسرائيل علشان تشيلنا من قائمة الدول الحفيفة بالمخاطر السياسية رغم اعتراض الشعب والقوى السياسية المعارضة ... عملنا تحالفات جديدة في المنطقة مع دول الخليج وليبيا مؤخرا لعمل اقتصاد قوي موحد ... وزير استثمار شغال من نـــــــار ... قطاعات لسة بتقول يا هادي وبيبدء معدل النمو بتاعها ... آبار بترولية جديدة بتكتشف في المنطقة ... توقعات ان مصر تكون اكبر منتج للذهب الخام في العالم بنهاية 2010 وده تقرير ظهر على احد المواقع الخليجية من كام شهر ... ولســـــــــــة ...
العالم كله عينه على المنطقة ... اطماع الغرب مش هتخلص .. فيه اللي بيدخل مادد ايده وفيه اللي داخل بالسلاح زي ما حصل في العراق واحتلال الثروات النفطية وبداية مؤامرة على ايران اكبر منتجي الغاز ومحاولة للايقاع بالسودان اكبر اراضي ميئة بالثروات الطبيعية من بترول ويورانيوم وخلافه .... ساركوزي بيحاول يكسب ود العرب بأي طريقة ... وبيحاول يعمل حلف اطلسي ... وامريكا عدد مؤيدينها قلو بسب تضارب المصالح وارتفاع البترول ..... ولسة ياما هنشوف ..
واخيرا احب افكركم ان وارن بوفيت اعظم مستثمر في العالم مكنش محلل فني وبدء بـ 10000 دولار وانتهى بـ 63 مليار دولار ... وكان من اهم استراتيجياته ... لا تشتري حتى تجد شيئا يستحق الشراء واشتري في الشركة تحت قيمتها العادلة ... واحنا كل اسهمنا تحت القيمة العادلة وبنسبة كبيرة تفوق في بعض الاسهم الـ 50% ... ... كلامي مش هجوم على التحليل الفني اللي بدرسه حاليا واللي بعشقه ... بس مش كل أداه استثمارية تنفع في اي وقت .. رغم ان المؤشرات بتدي انفراجات ايجابية في معظم الاسهم بس برضه الناس مش مقتنعة .. انا فعلا بدءت اشتري في الجزء اللي فاضل في سيولتي من الاسبوع اللي فات .. في اسهم مينفعش تتساب كده .. وحتى لو نزلت تاني مش هزعل لاني عارف انا بعمل ايه وواثق من قراري ومش محتاج توجيه من حد ...
اتمنالكم الخير في كل وقت .... معلش طولت عليكم
أختفى عندما يظهر الضعفاء ... وأظهر لتنافس الأقوياء
Ahmed Thabet
ليست هناك تعليقات:
إرسال تعليق