الدستور : كتب - حسن ضاحي
مع انتهاء امتحانات الثانوية العامة يبدأ موسم الصيف علي شاطئ كورنيش مدينة الإسكندرية عروس البحر الأبيض المتوسط وشاطئ ميامي من أجمل وأروع وأشهر شواطئ كورنيش إسكندرية التي تزدحم بالمصطافين وعشاق الإسكندرية. الشيء الجميل في عدد من شواطئ كورنيش الإسكندرية أن الدخول إليها برسوم مخفضة وعدد آخر بدون رسوم دخول أصلاً ويستقبل كل عام مع بداية موسم الصيف شاطئ ميامي الآلاف من المصطافين من جميع محافظات مصر «الوجه البحري والوجه القبلي» للاستمتاع بمياه البحر الأبيض المتوسط ويعتبر كورنيش إسكندرية من أهم الأماكن السياحية بجمهورية مصر العربية والشيء اللي بيعكنن علي المصطافين وزوار الإسكندرية من محافظات مصر الارتفاع الجنوني في أسعار الخدمات والوجبات في مطاعم كورنيش إسكندرية وارتفاع أسعار إيجار الشقق المفروشة الشقة المفروشة في ميامي علي البحر من 300 - 400 جنيه في اليوم الواحد - وعلشان تاخد شقة بعيدة عن الشاطئ 10-15 كيلو مترا هتلاقي شقة بـ 100-150 جنيهاً في اليوم والسماسرة علي كورنيش إسكندرية أرجعوا سبب ارتفاع الشقق المفروشة في الصيف لوجود المصطافين من دول الخليج وأسعار الخدمات علي شاطئ ميامي الشمسية بـ 3 جنيه والكرسي بـ 2 جنيه والترابيزه بـ 3 جنيه والعوامة بـ 4 جنيه.. أسعار المشروبات مرتفعة شوية في الكافيتريات الموجودة علي الشاطئ الحاجة الساقعة بـ 5 جنيه، الشاي بـ 4 جنيه، القهوة بـ 5 جنيه، برضه بالإضافة لارتفاع أسعار الوجبات.
الجدير بالذكر أن شواطئ كورنيش الإسكندرية من أرخص شواطئ الساحل الشمالي بداية من الكيلو 21 وأبو تلات ومراقيا والقري السياحية ومارينا وسيدي عبدالرحمن وأشهر شواطئ كورنيش إسكندرية المفضلة للمصطافين سيدي بشر وميامي والعصافرة وبير مسعود وسان ستيفانو والشاطبي والمندرة وعلشان توصل لمدينة إسكندرية ميني باص من القاهرة بـ 18 جنيه وتنزل محطة مصر أو الموقف الجديد وتركب ميني باص أبو قير أو المعمورة وتختار تنزل أي شاطئ يعجبك علي كورنيش إسكندرية - الشيء الجميل هتلاقي الآلاف من عشاق ومحبي مدينة وشواطئ إسكندرية الذين لا يتركون فرصة موسم الصيف إلا ويحضرون لقضاء إجازة سعيدة علي شواطئ كورنيش إسكندرية - اللي مازالت الأحسن والأجمل والأرخص مقارنة بشرم الشيخ - والبحر الأحمر - والغردقة - والساحل الشمالي - ومرسي مطروح.
ليست هناك تعليقات:
إرسال تعليق